नेपाल स्टक एक्सचेञ्ज (नेप्से) परिसूचकमा गिरावट आउने क्रम आज पनि रोकिएको छैन। पछिल्लो छ कारोबार दिनदेखि लगातार घटिरहेको नेप्से परिसूचक आज दुई दशमलव ७९ अङ्कले घटेर दुई हजार ६०९ दशमलव शून्य पाँचको विन्दुमा कायम भएको छ।
आज तीन सय नौ कम्पनीको एक करोड ६९ लाख सात हजार ७३७ कित्ता शेयर ७९ हजार ८९३ पटक खरिदबिक्री हुँदा रु आठ अर्ब ५० करोड ९२ लाख २१ हजार ३१२ दशमलव ६१ को कारोबार भएको छ। आज एक सय कम्पनीको शेयर मूल्य बढ्दा एक सय ४५ कम्पनीको घटेको छ भने एउटा स्थिर अवस्थामा छ।
आज ओम मेगाश्री फर्मास्युटिकल्स लिमिटेडको शेयर मूल्यमा सकारात्मक सर्किट लागेको छ। त्यस्तै, छाब्दी हाइड्रोपावर लिमिटेड नौ दशमलव ९९, विन नेपाल लघुवित्तीय संस्था लिमिटड नौ दशमलव ५३, नेपाल पुनर्बिमा कम्पनी आठ दशमलव ४१, बाराही हाइड्रोपावर पब्लिक लिमिटेडको शेयर मूल्य सात दशमलव ३२ प्रतिशतले बढेको छ।
आज सबैभन्दा बढी कर्पोरेट डेभपलमेन्ट बैंक लिमिटेडको शेयर मूल्य आठ दशमलव ७१ प्रतिशतले घटेको छ। साथै सबैभन्दा बढी नेपाल रिइन्स्योरेन्स कम्पनीको रु ७० करोड ३७ लाखको शेयर कारोबार भएको छ।
