लामो समयदेखि जारी रहेको शिक्षकहरूको आन्दोलन अन्ततः स्थगित भएको छ। सरकार र नेपाल शिक्षक महासंघबीच ९ बुँदे सहमति भएपछि देशभरका सामुदायिक विद्यालयहरू आजदेखि खुलेका छन्।
शिक्षा विधेयकलाई लिएर असन्तुष्ट शिक्षकहरूले चैत २० गतेदेखि काठमाडौंमा प्रदर्शन गर्दै आएका थिए। यस आन्दोलनका कारण पठनपाठन प्रभावित भएको थियो भने नयाँ शैक्षिक सत्रको भर्ना अभियान समेत रोकिएको थियो। अभिभावक र विद्यार्थीहरू विद्यालय खुल्ने पर्खाइमा थिए।
सहमति अनुसार अब रोकिएका भर्ना कार्यक्रम तत्काल सुरु हुनेछन् र पठनपाठन पनि नियमित रूपमा सञ्चालन हुनेछ। नेपाल शिक्षक महासंघका अध्यक्ष लक्ष्मी किशोर सुवेदीले शिक्षकहरूलाई तुरुन्तै विद्यालय फर्कन आह्वान गरेका छन्।
आन्दोलनका कारण स्थगित भएको कक्षा १२ को परीक्षा वैशाख २१ गतेदेखि हुने भएको छ। राष्ट्रिय परीक्षा बोर्डले नयाँ तालिका सार्वजनिक गरिसकेको छ। बोर्डले परीक्षामा सहयोग गर्न शिक्षकहरूलाई आग्रह गरेको छ।
महासंघले आन्दोलनका कारण भएको शैक्षिक क्षतिलाई कम गर्न अतिरिक्त कक्षा सञ्चालन गर्ने बताएको छ। अध्यक्ष सुवेदीले विद्यार्थीहरूको भविष्यलाई ध्यानमा राखेर विदाका दिनमा पनि पढाएर पाठ्यक्रम पूरा गर्ने प्रतिबद्धता व्यक्त गरेका छन्।
