कास्कीमा आयोजित एक कार्यक्रममा माओवादी केन्द्रका अध्यक्ष प्रचण्डले प्रधानमन्त्री केपी शर्मा ओलीलाई मानसिक स्वास्थ्य परीक्षण गराउन सुझाव दिएका छन्।
जनतासँग माओवादी मध्यपहाडी लोकमार्ग जनजागरण अभियानको क्रममा कास्की पुगेका प्रचण्डले प्रधानमन्त्री ओलीले आफू राजावादीसँग मिल्ने योजनामा रहेको भन्ने अभिव्यक्ति दिएको प्रति लक्षित गर्दै यस्तो बताएका हुन्। प्रेस सेन्टर गण्डकी प्रदेशले आयोजना गरेको पत्रकार सम्मेलनमा बोल्दै प्रचण्डले ओलीको भनाइप्रति आश्चर्य व्यक्त गरे र यदि त्यस्तो हो भने उनले मानसिक अस्पतालमा गएर जँचाउनु पर्ने बताए।
प्रचण्डले माओवादीले प्रतिगामी शक्तिहरू विरुद्ध गरेको प्रतिवादले वर्तमान सरकारलाई केही हदसम्म सहयोग पुगेको दाबी गरे। उनले आफ्नो पार्टीले निरङ्कुशतावादी र राजावादीहरूको पर्दाफास गर्दा सरकारलाई जन आक्रोशबाट थोरै भए पनि राहत मिलेको बताए।
साथै, प्रचण्डले माओवादीको जनजागरण अभियान राष्ट्रिय एकतालाई बलियो बनाउने उद्देश्यले सञ्चालन भइरहेको बताए।
