भारतीय क्रिकेट टोलीका दिग्गज ब्याट्सम्यान विराट कोहलीले टेस्ट क्रिकेटबाट सन्यास घोषणा गरेका छन्। १४ वर्ष लामो टेस्ट करियरमा कोहलीले १२३ टेस्ट खेल खेले, जसमा ६८ खेलमा उनले कप्तानी गरे। उनले ४६.८५ को औसतमा ९२३० रन बनाएका छन्।
कोहलीले सामाजिक सञ्जालमा एक विज्ञप्ति जारी गर्दै भने, "मैले टेस्ट क्रिकेटमा पहिलो पटक निलो जर्सी लगाएको १४ वर्ष भइसक्यो। साँचो भन्नुपर्दा, यो फर्म्याटले मलाई कस्तो यात्रामा लैजान्छ भनेर मैले कहिल्यै सोचेको थिइनँ। यसले मलाई परिक्षण गर्यो, आकार दियो र जीवनभर बोक्ने पाठहरू सिकायो।"
उनले थपे, "सेतो पोशाकमा खेल्नुमा गहिरो व्यक्तिगत भावना छ। शान्त मिहिनेत, लामो दिनहरू, साना क्षणहरू जुन कसैले देख्दैन तर सधैं तपाईंसँग रहन्छ। यो फर्म्याटबाट बिदा हुँदा सजिलो त छैन, तर सही महसुस हुन्छ। मैले यसलाई सबथोक दिएँ, र यसले मलाई आशा गरेभन्दा धेरै फिर्ता दियो। म कृतज्ञताले भरिएको हृदय लिएर बिदा हुँदैछु - खेलको लागि, मैदानमा सँगै खेलेका मानिसहरूका लागि, र मलाई साथ दिने हरेक व्यक्तिका लागि। म सधैं आफ्नो टेस्ट करियरलाई मुस्कानका साथ सम्झनेछु।"
ईएसपीएन क्रिकइन्फोका अनुसार कोहलीले जुन २० देखि सुरु हुने इङ्ल्यान्डविरुद्धको पाँच टेस्टको श्रृंखलाअघि नै बीसीसीआईलाई टेस्ट क्रिकेटबाट सन्यास लिने आफ्नो इच्छा जानकारी गराएका थिए। उनी टोलीमा रहने अपेक्षा गरिएको थियो। स्रोतका अनुसार कोहलीले विगत एक महिनादेखि बीसीसीआईका अधिकारीहरूसँग यस विषयमा छलफल गरिरहेका थिए।
पछिल्लो समय कोहलीको प्रदर्शन टेस्टमा खासै राम्रो थिएन। नोभेम्बर २०२४ मा पर्थ टेस्टमा उनले १०० रन बनाएका थिए, जुन जुलाई २०२३ (पोर्ट अफ स्पेनमा वेस्ट इन्डिजविरुद्ध) पछि टेस्टमा उनको पहिलो शतक थियो। सन् २०१९ मा पुणेमा दक्षिण अफ्रिकाविरुद्ध २५४ रन बनाएर आफ्नो करियरको उत्कृष्ट प्रदर्शन गरेका कोहलीको औसत ५५.१० बाट पछिल्लो २४ महिनामा ३२.५६ मा झरेको थियो।
यद्यपि, टोली व्यवस्थापन र चयनकर्ताहरूले उनको अनुभव इङ्ल्यान्ड भ्रमणमा चाहन्थे, जहाँ भारतले नयाँ कप्तानको नेतृत्वमा खेल्नेछ। रोहित शर्माले टेस्ट क्रिकेटबाट सन्यास लिएपछि शुभमन गिललाई कप्तान बनाउने चर्चा छ।
रोहित शर्माबाहेक आर अश्विनले पनि गत वर्ष अन्तर्राष्ट्रिय क्रिकेटबाट सन्यास लिएका थिए। चेतेश्वर पुजारा र अजिंक्य रहाणे अहिले टोलीमा छैनन्। मोहम्मद शामी लामो समयको चोटपछि फर्किएका कारण उनको प्रदर्शनमा प्रश्नचिह्न खडा भएको छ। केएल राहुल, रविन्द्र जडेजा र जसप्रित बुमराह मात्र भारतीय टेस्ट क्रिकेटको त्यो युगका खेलाडी हुन्, जहाँ टोलीले दुई पटक विश्व टेस्ट च्याम्पियनसिप (डब्ल्यूटीसी) को फाइनल खेलेको थियो, पहिलो पटक कोहलीको नेतृत्वमा।
कोहली र रोहित दुवैलाई बीसीसीआईको पछिल्लो सम्झौतामा उच्चतम श्रेणी (ए+) मा राखिएको थियो, जुन सामान्यतया तीनवटै अन्तर्राष्ट्रिय फर्म्याट खेल्ने खेलाडीहरूका लागि हो। कोहली र रोहितले गत वर्ष भारतले विश्वकप जितेपछि टी२० अन्तर्राष्ट्रियबाट सन्यास लिएका थिए, र अब उनीहरू एकदिवसीय क्रिकेटमा मात्र उपलब्ध हुनेछन्।
कोहलीले सन् २०११ को मध्यमा वेस्ट इन्डिजको भ्रमणमा टेस्टमा डेब्यू गरेका थिए। किङ्स्टनमा उनले ४ र १५ रन बनाएका थिए। त्यसपछि मुम्बईको वानखेडे स्टेडियममा वेस्ट इन्डिजविरुद्ध ५२ र ६३ रन बनाएर आफ्नो क्षमता देखाए। अस्ट्रेलियाको भ्रमणमा उनले पहिलो टेस्ट शतक एडिलेडमा बनाए।
कोहलीले ६८ टेस्ट खेलमा कप्तानी गर्दा ४० खेल जितेका थिए, १७ खेलमा हार बेहोरेका थिए। उनी भारतका सबैभन्दा सफल टेस्ट कप्तान हुन्।
