अमेरिकी राष्ट्रपति डोनाल्ड ट्रम्पले बिहीबार रुस-युक्रेन वार्तामा प्रगति भएमा टर्की जान सक्ने बताएका छन्।
कतारमा उनले भने, "यदि केही भयो र त्यो उचित लाग्यो भने म शुक्रबार टर्की जानेछु। यसले विश्वलाई मनोवैज्ञानिक रूपमा मद्दत गर्नेछ र हामी रुस/युक्रेनसँग राम्रो गर्न सक्छौं भन्ने लाग्छ।"
उनले एक दिनअघि रुसी राष्ट्रपति भ्लादिमिर पुटिन आएमा वार्ताका लागि आफू टर्की जान तयार रहेको बताएका थिए। तर, युक्रेनी राष्ट्रपति भोलोदिमर जेलेन्स्कीले पुटिनलाई शान्तिको बारेमा गम्भीर रहेको प्रमाणित गर्न आह्वान गरे पनि रूसले कनिष्ठ प्रतिनिधिमण्डल पठाउने निर्णय गरेको छ।
पुटिन अनुपस्थित हुनुमा आश्चर्य व्यक्त नगर्दै ट्रम्पले भने, "म नगएपछि उहाँ किन जानुहुन्छ र?"
पदभार सम्हालेपछि ट्रम्पले तुरुन्तै युद्ध अन्त्य गर्ने वाचा गरेका थिए। तर, रूसले युक्रेनले समर्थन गरेको ३० दिने बिना शर्त युद्धविरामको अमेरिकी प्रस्ताव अस्वीकार गरेको थियो।
युक्रेन र अमेरिकी प्रशासनबीच सम्बन्ध सुधारिएको भए पनि ट्रम्पले कतारमा जेलेन्स्कीबारे नकारात्मक टिप्पणी गरे। उनले भने, "मलाई लाग्छ उहाँ सायद इतिहासकै सबैभन्दा महान् सेल्समेन हुनुहुन्छ।"
आफ्नो प्रशासनले कसरी युक्रेनलाई सैन्य सहायता कटौती गरेको छ भन्ने खुलासा गर्दै ट्रम्पले भने, "यो बच्चाबाट क्यान्डी खोसेजस्तै सजिलो थियो।"
अमेरिकी राष्ट्रपति तीन राष्ट्रको खाडी भ्रमणमा छन्। भ्रमणका क्रममा उहाँ बिहीबार संयुक्त अरब इमिरेट्स पनि जाँदै हुनुहुन्छ। ट्रम्पले यो यात्राले टर्की जान 'धेरै कठिन' बनाएको बताए। यद्यपि विदेशमन्त्री मार्को रुबियोले टर्कीमा 'अद्भुत काम' गरिरहेको उनले जानकारी दिए।
