उत्तर कोरियाको नयाँ नौसैनिक युद्धपोत (विध्वंसक) को प्रक्षेपण समारोहमा ठूलो दुर्घटना भएको छ। सरकारी सञ्चार माध्यमका अनुसार उत्तर कोरियाली नेता किम जोङ उनले उक्त घटनालाई ‘आपराधिक कार्य’ को संज्ञा दिएका छन्।
कोरियन सेन्ट्रल न्युज एजेन्सी (केसिएनए) का अनुसार बुधबार पूर्वी बन्दरगाह शहर चोङजिनमा पाँच हजार टन क्षमताको नयाँ युद्धपोत प्रक्षेपण गर्ने क्रममा ‘गम्भीर दुर्घटना’ भएको हो। दक्षिण कोरियाको सेनाले उत्तर कोरियाले बिहीबार ‘धेरैवटा अज्ञात क्रुज मिसाइलहरू’ पनि प्रहार गरेको जनाएको छ, जुन दक्षिण हाम्ग्योङ प्रान्त नजिकै जापान सागरतर्फ प्रहार गरिएका थिए।
केसिएनएका अनुसार किमले निरीक्षण गरेको युद्धपोतको प्रक्षेपण अनुभवहीन कमान्ड र परिचालन लापरवाहीका कारण असफल भएको हो। उक्त दुर्घटनामा युद्धपोतको तल्लो भागका केही भागहरू कुच्चिएका छन्, जसले युद्धपोतको सन्तुलन नै बिग्रिएको छ।
किमले उक्त घटनालाई ‘सहन नसकिने’ भन्दै ‘पूर्ण लापरवाहीका कारण भएको आपराधिक कार्य’ घोषणा गरेका छन्। जिम्मेवार अधिकारीहरूको ‘गैरजिम्मेवार गल्तीहरू’ लाई अर्को महिना बोलाइने पार्टी केन्द्रीय समितिको पूर्ण बैठकमा सम्बोधन गरिने उनले बताएका छन्।
दक्षिण कोरियाको सेनाले अमेरिकी र दक्षिण कोरियाली गुप्तचर अधिकारीहरूले उत्तर कोरियाको युद्धपोतको साइड–लन्च प्रयास असफल भएको अनुमान गरेको बताएका छन्। ज्वाइन्ट चिफ्स अफ स्टाफका प्रवक्ता ली सुङ–जुनले पत्रकारहरूलाई बताएअनुसार यस मामिलामा प्रयोग गरिएको साइड–लन्च विधि अब दक्षिण कोरियाको सेनाले प्रयोग गर्दैन। लीका अनुसार हाल उक्त युद्धपोत पानीमा ढलिरहेको छ। यसको आकार र मापनका आधारमा यो पाँच हजार टन विध्वंसक–वर्गको युद्धपोत चो ह्योनसँग मिल्दोजुल्दो छ भन्ने विश्वास गरिन्छ, जुन उत्तर कोरियाले गत महिना सार्वजनिक गरेको थियो।
गत महिना प्योङयाङको सरकारी मिडियाले किम आफ्नी छोरी जु एइसँग चो ह्योनको उद्घाटन समारोहमा सहभागी भएको तस्बिर सार्वजनिक गरेको थियो। धेरै विज्ञहरू जु एइलाई किमको सम्भावित उत्तराधिकारीको रूपमा हेर्छन्। उत्तर कोरियाले उक्त युद्धपोत ‘सबैभन्दा शक्तिशाली हतियार’ ले सुसज्जित रहेको र यो ‘अर्को वर्षको सुरुमा सञ्चालनमा आउने’ दाबी गरेको छ। केही विश्लेषकहरूका अनुसार उक्त युद्धपोत आणविक हतियार बोक्न सक्षम छोटो दूरीको सामरिक मिसाइलहरूले सुसज्जित हुनसक्छ।
रूसी सम्बन्ध:
दक्षिण कोरियाली सेनाले सम्भवतः प्योङयाङले मस्कोलाई युक्रेनसँग लड्न मद्दत गर्न हजारौं सेना तैनाथ गरेको बदलामा चो ह्योन रूसी सहयोगमा विकसित भएको हुनसक्ने बताएको छ। उत्तर कोरिया अध्ययनका लागि विश्व संस्थान चलाउने शोधकर्ता अहन चान–इलले बुधबारको दुर्घटनामा संलग्न युद्धपोत पनि रूसी सहयोगमा निर्माण गरिएको हुनसक्ने बताएका छन्। प्रक्षेपण समारोह सम्पन्न भएको उत्तर कोरियाली शहर चोङजिन रुसको भ्लाडिभोस्टोक बन्दरगाह नजिक रहेको उनले बताए।
अहनले भने, “यो पनि सम्भव छ कि जहाजका लागि अनुमानित समयरेखा – जब एसेम्बली पूरा हुनेछ र जहाज प्रक्षेपण सहित – रूसी पक्षसँग साझा गरिएको थियो। यस्तो देखिन्छ कि डक हतारमा निर्माण गरिएको थियो र जहाज निर्माण प्रक्रियामा धेरै समस्या उत्पन्न भएको हुनसक्छ। आजको घोषणासँगै प्योङयाङले आफ्ना मानिसहरूलाई मात्र नभएर रुसी पक्षलाई पनि सङ्केत गरिरहेको देखिन्छ।”
नौसेनाको सुदृढीकरण:
उत्तर कोरियाले पहिलो पटक अप्रिलमा युक्रेन युद्धमा मस्कोलाई समर्थन गर्न रुसमा सेना तैनाथ गरेको पुष्टि गरेको थियो। मस्को र प्योङयाङले हालै दुई देशलाई जोड्ने पहिलो सडक पुल निर्माण सुरु गरेको घोषणा गरेका छन्।
उत्तर कोरियाले गत वर्ष पनि संयुक्त राष्ट्रसङ्घको प्रतिबन्धको उल्लङ्घन गर्दै ब्यालेस्टिक क्षेप्यास्त्र प्रक्षेपण गरेको थियो। मार्चमा किमले आणविक शक्तिसम्पन्न पनडुब्बी निर्माण गर्ने परियोजनाको निरीक्षण गर्नुभयो र नौसेनालाई ‘मौलिक रूपमा’ बढावा दिन प्योङयाङको रक्षात्मक रणनीतिको एक प्रमुख हिस्सा थियो भनी दाबी गर्नुभयो। त्यस समयमा किमले युद्धपोतको विकाससहित देशको सतह र पानीमुनि नौसेना बलको आधुनिकीकरणका लागि आह्वान गरेका थिए।
प्योङयाङले पहिले ‘रेडियोधर्मी सुनामी’ फैलाउन सक्ने पानीमुनि आणविक आक्रमण ड्रोनहरू विकास गरिरहेको दाबी गरेको छ, तर विश्लेषकहरूले वास्तवमा त्यस्तो हतियार छ कि छैन भनेर प्रश्न गरेका छन्।
सियोलको प्रमुख सुरक्षा सहयोगी वासिङ्टनले हालैका वर्षहरूमा संयुक्त सैन्य अभ्यासहरू बढाएको छ र उत्तरलाई रोक्नका लागि विमान वाहक र आणविक शक्ति सम्पन्न पनडुब्बी जस्ता रणनीतिक अमेरिकी सम्पत्तिहरूको उपस्थिति बढाएको छ।
प्योङयाङले बारम्बार आफूलाई ‘अपरिवर्तनीय’ आणविक हतियार भएको राष्ट्र घोषणा गरेको छ र नियमित रूपमा अमेरिका–दक्षिण कोरियाको संयुक्त अभ्यासलाई आक्रमणको अभ्यासका रूपमा निन्दा गर्दछ।
