सन् २०२५ को अप्रिल महिनामा नेपालमा हालसम्मकै उच्च संख्यामा विदेशी पर्यटक भित्रिएका छन्।
नेपाल पर्यटन बोर्डले उपलब्ध गराएको तथ्याङ्कअनुसार अप्रिल महिनामा मात्रै १ लाख १६ हजार ४९० विदेशी पर्यटक नेपाल आएका छन्। नेपालको पर्यटनमा अप्रिल महिनाको विदेशी पर्यटक आगमनमा यो नयाँ रेकर्ड कायम भएको बोर्डले जनाएको छ।
अप्रिलमा सबैभन्दा बढी भारतबाट २५ हजार ९३३, अमेरिकाबाट १० हजार ५३, चीनबाट ९ हजार ३७ र संयुक्त अधिराज्य बेलायतबाट ६ हजार ८३८ पर्यटक नेपाल भित्रिएका छन्। यद्यपि, पछिल्लो तथ्याङ्क हेर्दा भारतीय र चिनियाँ पर्यटकको संख्यामा उल्लेख्य वृद्धि हुन सकेको छैन।
बोर्डका अनुसार सन् २०१९ को तुलनामा १०६.५ प्रतिशतले विदेशी पर्यटक आगमनमा बढोत्तरी भएको छ। कोरोना महामारीपूर्व सन् २०१९ को अप्रिल महिनामा सबैभन्दा धेरै १ लाख ९ हजार ३९९ विदेशी पर्यटक नेपाल आएका थिए। सन् २०२४ को अप्रिलमा १ लाख ११ हजार ३७६ जना विदेशी पर्यटक नेपाल आएका थिए भने सन् २०२३ को अप्रिलमा ९८ हजार ७७३ जना पर्यटक नेपाल भित्रिएका थिए।
बोर्डले एक विज्ञप्ति जारी गर्दै भनेको छ, "हामीले आधिकारिक रूपमा १०६.५ प्रतिशत पूर्व-महामारी स्तरमा पुगेका छौं, यसले बलियो 'रिकभरी' र नेपालमा बढ्दो विश्वव्यापी चासो देखाउँछ।"
बोर्डका प्रमुख कार्यकारी अधिकृत दीपकराज जोशीले अप्रिल महिनाको पर्यटक आगमन उत्साहजनक रहेको बताएका छन्। उनले भने, "यो वृद्धि नेपालको स्थायी आकर्षण र पर्यटन सभ्यताको प्रमाण हो।"
बोर्डको विवरण अनुसार यस वर्षको चार महिना (जनवरी–अप्रिल) को अवधिमा ४ लाख १५ हजार ४८ पर्यटक नेपाल भित्रिएका छन्। जनवरीमा ७९ हजार ९९१, फेब्रुअरीमा ९६ हजार ८८० र मार्चमा १ लाख २१ हजार ८०० विदेशी पर्यटक नेपाल आएका थिए।
