निर्माण कम्पनीको ढिलासुस्तीले केही समय पुल निर्माणकार्य रोकिएकोमा हाल भने धमाधम काम भइरहेको छ। पुलको भौतिक प्रगति ४८ प्रतिशत पुगेको पूर्वाधार विकास कार्यालय तनहुँका प्रमुख सिनियर डिभिजन इञ्जीनीयर रवीन्द्र तिवारीले जानकारी दिएका छन्।
तिवारीका अनुसार पटक–पटक ताकेता गरेपछि निर्माण कम्पनीले हाल तीव्र रूपमा काम गर्न थालेको हो। पुलको स्टील पाटर्सको निर्माण हुने भएकाले फेब्रिकेसन कार्य भइसकेको छ। दुई ‘स्पाम’ मध्ये चालु आर्थिक वर्षमा एक ‘स्पाम’ निर्माणकार्य पूरा हुनेगरी काम गरिरहेको छ, भने बाँकी अर्को एक ‘स्पाम’ निर्माणको लागि निर्माण कम्पनीले भारतबाट समान ल्याइसकेको उनले बताए। गण्डकी प्रदेश सरकारको रू ३२ करोड ४० लाख २७ हजार तीन सय ९४ को लागतमा पुल निर्माण भइरहेको तिवारीले जानकारी दिएका छन्।
कार्यालयका अनुसार पुल निर्माणका लागि विसं २०७७ मङ्सिर १९ गते रसुवा इलाइट जेभी काठमाडौँसँग सम्झौता भएको थियो। एक सय ५५ मिटर लामो रहने पुलको चौडाइ ९ दशमलव ५० मिटर रहनेछ। पाइल फाउण्डेशनमा निर्माण हुने पुल ‘स्टील ट्रस’को हुनेछ। उक्त पक्की पुल तीन वर्षमा निर्माण सम्पन्न गर्ने म्यादसहित विसं २०७७ चैत २३ गते शिलान्यास गरिएको थियो। सम्झौता अनुसार काम भएको भए यतिबेला पुल बनेर गाडी गुडिसकेको हुने थियो।
सम्झौताको अवधिमा विसं २०८० जेठ ९ गतेसम्म पुल निर्माण सम्पन्न गर्नुपर्ने थियो। उक्त पुलको हालसम्म तीन पटक म्याद थप भइसकेको र अन्तिम पटकका लागि विसं २०८२ असोजसम्म म्याद थप गरिएको कार्यालयले जनाएको छ।
पुल निर्माणपछि व्यास नगरपालिका र ऋषिङ गाउँपालिकाका जनतालाई आवतजावतमा सहज हुनेछ। हाल सोही ठाउँमा झोलुङे पुलबाट मानिस र मोटरसाइकल आवतजावत गर्छन्। त्यसको करिब एक किलोमिटरमाथि तनहुँ जलविद्युत् आयोजनाको सहयोगमा पक्की पुल निर्माण गरिएको छ। त्यहाँबाट दमौली आउनुपर्दा करिब तीन किलोमिटर दूरी तय गर्नुपर्छ।
पुल निर्माण पूरा भएपछि दमौली आउन पाँच सय मिटर दूरी मात्रै लाग्छ। झोलुङ्गे पुलबाट मोटरसाइकल गुडाइदिँदा पैदलबाट वारपार गर्नेलाई समस्या हुँदै आएको छ। स्थानीयवासीले वर्षौदेखि सेतीनदीमाथि पक्की पुलको माग गर्दै आएका थिए। पुल निर्माणले गति लिएसँगै स्थानीय बासिन्दामा खुसी छाएको ऋषिङ गाउँपालिकाका अध्यक्ष राजेन्द्रकृष्ण श्रेष्ठले जानकारी दिएका छन्।
