नेपाली कांग्रेसका महामन्त्री गगनकुमार थापाविरुद्ध दायर भएको अदालत अवहेलना मुद्दामा आज सर्वोच्च अदालतमा सुनुवाइ हुँदैछ। न्यायाधीश सपना मल्ल प्रधान र नित्यानन्द पाण्डेको संयुक्त इजलासमा मुद्दाको पेशी तोकिएको छ।
महामन्त्री थापाले लोकतन्त्र दिवसको अवसरमा संवैधानिक निकायका पदाधिकारीहरूको नियुक्ति प्रक्रियामा सर्वोच्च अदालतले 'डिल' गरेको आशयको अभिव्यक्ति दिएका थिए। उनले संवैधानिक आयोगका पदाधिकारीहरूको कार्यकाल सकिन लाग्दासमेत नियुक्ति नहुनुमा अदालतको भूमिकामाथि प्रश्न उठाएका थिए।
अधिवक्ताहरू अनन्तराज लुईटेल, प्रतिभा उप्रेती र विशाल थापाले थापाको उक्त अभिव्यक्तिको कारण अदालतको अवहेलना भएको भन्दै सर्वोच्च अदालतमा मुद्दा दर्ता गराएका थिए। मुद्दामा थापाको टिप्पणीले अदालतको गरिमा र निष्पक्षतामा आँच पुर्याएको दाबी गरिएको छ।
यसैबीच, विभिन्न संवैधानिक निकायका ५२ पदाधिकारीको नियुक्तिसम्बन्धी विवाद सर्वोच्च अदालतमा विचाराधीन छ। थापाको टिप्पणीले यस विषयमा थप बहस सिर्जना गरेको छ। आजको सुनुवाइले यो मुद्दालाई कुन दिशामा लैजान्छ, धेरैको चासो रहेको छ।
