जल तथा मौसम विज्ञान विभाग अन्तर्गतको मौसम पूर्वानुमान महाशाखाले सोमबार रातिदेखि देशका केही भूभागमा हिमपात र वर्षाको सम्भावना रहेको जानकारी दिएको छ।
महाशाखाले सोमबार विशेष मौसम बुलेटिन जारी गर्दै पश्चिमी वायु र अरब सागरमा बनेको न्यूनचापीय प्रणालीको प्रभाव रहेको जनाइरहेको छ।
यसको प्रभावका कारण सोमबार रातिदेखि कात्तिक १२ गते बुधबार बिहानसम्म:
- गण्डकी, लुम्बिनी र कर्णाली प्रदेशका केही स्थानमा
- बाँकी प्रदेशका पहाडी तथा हिमाली भूभागका थोरै स्थानमा
हल्का देखि मध्यम हिमपात र वर्षाको सम्भावना रहेको छ।
त्यस्तै, गण्डकी प्रदेशका उच्च पहाडी तथा हिमाली भूभागका एक-दुई स्थानमा भारी हिमपात हुनसक्ने पनि महाशाखाले जनाएको छ।
महाशाखाले सम्भावित हिमपात र वर्षाले दैनिक जीवन, पर्वतारोहण, कृषि र पर्यटन क्षेत्रमा असर पार्न सक्ने भएकाले सर्वसाधारण र सरोकारवाला निकायमा आवश्यक सतर्कता अपनाउन अनुरोध गरेको छ।
