रुकुममा शुक्रबार बेलुका भएको जिप दुर्घटनामा आठ जनाको घटनास्थलमै मृत्यु भएको छ भने चालकसहित १० जना घाइते भएका छन्।
मृतकहरू:
जिल्ला प्रहरी कार्यालयका सूचना अधिकारी प्रहरी निरीक्षक हरिप्रसाद पुनका अनुसार मृतकहरूमा आठबिसकोट नगरपालिका–३ की ३० वर्षीया कमला ओली, आठबिसकोट नगरपालिका–१ का १६ वर्षीय टेकजंग बुढा, १५ वर्षीया दिलमाया बुढा, १५ वर्षीया कल्पना नेपाल, २८ वर्षीया सर्मिला बिक, आठबिसकोट नगरपालिका–२ की १७ वर्षीया मनिका ओली, १८ वर्षीया सर्मिला विक र २२ वर्षीया गोपाल ओली रहेका छन्।
घाइतेहरू:
घाइतेमध्ये मुसीकोट नगरपालिका–२ का ३४ वर्षीय जिप चालक टोपजंग बुढा, आठबिसकोट नगरपालिका–१ की १७ वर्षीया सिर्जना बुढा, १५ वर्षीया सपना नेपाल, १८ वर्षीया जुना बुढा, १७ वर्षीया संगिता बुढा, १९ वर्षीया शान्ति बुढा, १७ वर्षीया अञ्जना ऐरी, २० वर्षीया महिमा ओली, १७ वर्षीया मनिषा थापा, र १५ वर्षीया सबिता विक रहेका छन्।
घाइतेमध्ये जुना बुढालाई थप उपचारका लागि नेपालगञ्ज पठाइएको छ भने बाँकी घाइतेहरू जिल्ला अस्पताल सल्लेमा उपचाररत छन्।
दुर्घटनाको विवरण:
दुर्घटना रा १ ज ४२२ नम्बरको जिपले जिल्ला सदरमुकाम मुसीकोट खलंगाबाट आठबिसकोट नगरपालिकाको स्यालाखदीतर्फ यात्रा गर्दै गर्दा आठबिसकोट–बाँफिकोट सिमानामा पर्ने झारमारे लेकमा भएको हो। प्रहरीका अनुसार जिप सडकबाट करिब ७०० मिटर तल खसेको थियो। प्रारम्भिक अनुमानमा, क्षमताभन्दा बढी यात्रु रहेको कारण दुर्घटना भएको देखिन्छ।
