काठमाडौँ – प्रधानमन्त्री सुशीला कार्कीले वैदेशिक रोजगारीलाई सुरक्षित, पारदर्शी र सम्मानजनक बनाउन नीति आवश्यक भएको बताउनुभएको छ।
वैदेशिक रोजगार बोर्डको १८औँ स्थापना दिवसको अवसरमा आज आयोजित कार्यक्रममा उहाँले वैदेशिक रोजगारीबाट फर्किएका श्रमिकको परिवारमा सम्मानजनक पुनः एकीकरण र सामाजिक सुरक्षा सुनिश्चित गर्न बोर्डलाई निर्देशन दिनुभयो।
प्रधानमन्त्री कार्की, जो श्रम, रोजगार तथा सामाजिक सुरक्षा मन्त्री तथा बोर्डको अध्यक्षसमेत हुनुहुन्छ,ले वैदेशिक रोजगारीमा जाने व्यक्तिलाई दक्ष बनाउन आवश्यक सीप हस्तान्तरण गर्नुपर्नेमा जोड दिनुभयो।
उहाँले वैदेशिक रोजगारीबाट आर्जन भएको पुँजी, सीप, प्रविधि र अनुभव स्वदेशमा उत्पादनमूलक क्षेत्रमा लगानी गर्न प्रोत्साहन गर्ने नीति सरकारले अवलम्बन गरेको पनि बताउनुभयो।
प्रधानमन्त्री कार्कीले बोर्डले सुरु गरेको ‘कल सेन्टर’ र ‘टेलिमेडिसिन’ सेवाले श्रमिक हितमा उपयोगी योगदान गरेको उल्लेख गर्दै सबै कल्याणकारी सेवा पूर्णरूपमा अनलाइन प्रणालीमार्फत उपलब्ध गराउने पहल प्रशंसनीय भएको बताउनुभयो।
साथै, उहाँले वैदेशिक रोजगारीको विकल्पस्वरूप स्वदेशमै सम्मानजनक रोजगारीका अवसर सिर्जना, सीपमा आधारित उद्यम र पुनः एकीकरण कार्यक्रमहरूलाई विस्तार गर्न प्राथमिकता दिनुपर्ने बताउनुभयो। यसका लागि श्रम, रोजगार तथा सामाजिक सुरक्षा मन्त्रालयलाई कार्ययोजना तयार गरेर लागू गर्न निर्देशन दिइएको छ।
