बङ्गालको खाडीबाट उत्पन्न ‘मोन्था’ आँधीको प्रभाव देशभर क्रमशः कम हुँदै गएको छ। यसको असर केही स्थानमा अझै रहँदा पनि अधिकांश भू–भागमा मौसम सामान्य अवस्थामा फर्किने संकेत देखिएका छन्।
जल तथा मौसम विज्ञान विभागका अनुसार कोशी, बागमती र गण्डकी प्रदेशका पहाडी क्षेत्रहरूमा हल्का वर्षा र हिमपातको सम्भावना छ। यद्यपि, पहाडी भू–भागमा केही बदली भए पनि बाँकी देशमा मौसम मुख्यतया सफा रहने विभागले जनाएको छ।
पश्चिमी वायु र अरब सागरमा बनेको न्यून चापीय प्रणालीको प्रभाव केही क्षेत्रहरूमा अझै कायम रहेकाले बदली जारी रहेको छ।
आइतबार दिउँसो, कोशी, बागमती र गण्डकी प्रदेशमा सामान्यतया बदली रहनेछ भने मधेश प्रदेश र अन्य पहाडी क्षेत्रहरूमा आंशिक बदली हुनेछ। बाँकी भू–भागमा मौसम सफा रहने सम्भावना छ।
राति पनि कोशी, बागमती र गण्डकी प्रदेशका पहाडी भू–भागमा आंशिक बदली रहनेछ, बाँकी भू–भागमा मौसम मुख्यतया सफा रहने विभागले जनाएको छ। साथै, पहाडी र हिमाली क्षेत्रका केही स्थानमा हल्का वर्षा वा हिमपात हुन सक्ने सम्भावना छ।
