भक्तपुर नगरपालिका–४ गःहिटीस्थित लक्ष्मीनरसिंह मन्दिरको पुनर्निर्माण सम्पन्न भएको छ। वि.सं. १९९० सालको भूकम्पले भत्किएको मन्दिरको आज नेपाल मजदुर किसान पार्टीका अध्यक्ष नारायणमान बिजुक्छेँले उद्घाटन गरे।
भूकम्पले भत्काएपछि जस्ताले छाएर सानो मन्दिरका रूपमा रहेको यस मन्दिरलाई लामो अनुसन्धानपछि प्यागोडा शैलीमा तीन तलाको बनाइएको हो। पुनर्निर्माणको काम वि.सं. २०७६ सालमा सुरु भएको थियो।
उद्घाटन कार्यक्रममा अध्यक्ष बिजुक्छेँले नरसिंह शक्ति र लक्ष्मीसहितको नरसिंहले सन्तुलनको प्रतीक दर्शाउने बताए। "शक्तिको आडमा मात्र विजय हासिल हुने कुरा सत्य होइन भन्ने सन्देश यहाँबाट पाइन्छ," उनले भने।
कला संस्कृति संरक्षण र संवर्द्धन आफैँमा सेवामुखी काम भएको उल्लेख गर्दै अध्यक्ष बिजुक्छेँले सबै जनताले स्वयम्सेवी भावनाले उपभोक्ता समितिमार्फत मन्दिर पुनर्निर्माणमा खटिएकै कारण निर्माण सम्भव भएको बताए। सम्पदा पुनर्निर्माणको काम ठेक्कामा दिन नहुनेतर्फ सबै सचेत हुन आवश्यक रहेको बताउँदै भक्तपुरका जनताबीचको एकता तथा आपसी सहयोगको भावना नै भक्तपुरको विशेषता बन्दै गइरहेको उनले बताए।
भक्तपुर नगरपालिकाका प्रमुख सुनिल प्रजापतिले मल्लकालीन मौलिक स्वरूपमै मन्दिरको पुनर्निर्माण गरिएको बताए। मन्दिर पुनर्निर्माणका लागि भक्तपुर नगरपालिकाले रु सात करोड ७७ लाख लागत अनुमान गरेकामा उपभोक्ता समितिमार्फत रु चार करोड ८३ लाख चार हजार ३८ मा पुनर्निर्माण सम्पन्न भएको उनले जानकारी दिए।
नगरपालिकाका उपप्रमुख रजनी जोशीले इतिहासको गर्भमा लुप्त अवस्थामा रहेको लक्ष्मीनरसिंह मन्दिर पुनर्निर्माण हुनुले भक्तपुरवासीकै गौरव बढाएको बताइन्।
पुरातत्व विभागका महानिर्देशक सौभाग्य प्रधानाङ्गले नेपालमा हरेक १०० वर्षमा ठूल्ठूला भूकम्प जाने गरेको तथ्यांक प्रस्तुत गर्दै सम्पदाहरूको समयसापेक्ष ढङ्गले जीर्णोद्धार र मर्मतसम्भारमा पनि ध्यान दिनुपर्ने बताए। इतिहासविद् प्राडा पुरुषोत्तमलोचन श्रेष्ठले मौलिक स्वरूप गुमाइसकेको मन्दिरले पुनर्जीवन पाउनु ठूलो उपलब्धि भएको बताए।
कार्यक्रममा भक्तपुर जिल्लाका प्रमुख जिल्ला अधिकारी गोपालप्रसाद अर्याल, लक्ष्मीनरसिंह मन्दिर पुनर्निर्माण प्राविधिक समितिका संयोजक एवम् ख्वपः इन्जिनियरिङ कलेजका प्राचार्य ई. सुजन माक, लक्ष्मीनरसिंह मन्दिर उपभोक्ता समितिका अध्यक्ष न्हुछेराम भेलेले मन्दिर पुनर्निर्माणसम्बन्धी जानकारी गराएका थिए।
कार्यक्रममा बिजुक्छेँले मन्दिर पुनर्निर्माणका डकर्मी जगतराम न्हिसुतु र सिकर्मी नाइके बलराम शिल्पकारलाई दोसल्ला ओढाएर सम्मान गरे। मन्दिर उद्घाटनपूर्व भक्तपुर दरबार क्षेत्रबाट भक्तपुर नगरपालिकाका प्रमुख सुनिल प्रजापतिको नेतृत्वमा सांस्कृतिक बाजागाजासहित क्वाछेँ, टोमढी हुँदै लक्ष्मीनरसिंह मन्दिरसम्मर्याली भएको थियो।
