एसिसी मेन्स यु–१६ इस्ट जोन कप–२०२५ को सुदूरपश्चिम छनोटमा कैलालीले लगातार दोस्रो जित निकालेको छ। पहिलो खेलमा अछाममाथि ७१ रनको जित निकालेको कैलालीले सोमबार दोस्रो खेलमा दार्चुलालाई ९४ रनले पराजित गरेको हो।
कैलालीले दिएको एक सय ३१ रनको लक्ष्य पछ्याएको दार्चुला १६ दशमलव तीन ओभरमा ३६ रनमा अलआउट भयो। दार्चुलाका कुनै पनि ब्याटरले दोहोरो अङ्कमा रन जोड्न सकेनन्। कैलालीका रुद्रप्रसाद आचार्य पाँच विकेट लिँदै प्लेयर अफ द म्याच चुनिएका स्कोरर नुरेन अन्सारीले बताएका छन्।
यसअघि पहिला ब्याटिङ गरेको कैलालीले निर्धारित २० ओभरमा छ विकेटको क्षतिमा एक सय ३० रन बनायो। जसमा अविरल विकले अर्धशतकीय पारी खेल्दै ५३ रनमा नटआउट रहे। दार्चुलाका रोशन मिश्र र पुरषोत्तम रावलले दुई–दुई विकेट हात पारे। दार्चुलाको यो दोस्रो हार हो। यो हारले दार्चुला बाहिरिएको छ। कैलालीले भने फाइनलका लागि दाबी पेस गरेको छ।
यसैबीच सोमबार हुने भनिएको अछाम र कञ्चनपुरबीचको खेल वर्षाका कारण रद्द भएको छ। खेल रद्द भएपछि दुवै टोलीले अङ्क बाँडेका छन्। आज हुने कैलाली र कञ्चनपुरबीचको खेलले फाइनलमा पुग्ने टोलीको टुङ्गो लाग्ने छ।
सुदूरपश्चिम प्रादेशिक क्रिकेट सङ्घको आयोजना जेठ ८ देखि सुरु भएको प्रतियोगितामा नेपाल क्रिकेट सङ्घमा आबद्ध सुदूरपश्चिमका आठ जिल्लाको सहभागिता छ। छनोट प्रतियोगितामा उत्कृष्ट प्रदर्शन गर्ने खेलाडीलाई प्रदेशको टोलीमा समावेश गरिने सुदूरपश्चिम प्रादेशिक क्रिकेट सङ्घका प्रशिक्षक दीपेन्द्रबहादुर चन्दले जनाएका छन्।
एसियन क्रिकेट काउन्सिलको कार्यक्रमअनुसार नेपाल क्रिकेट सङ्घले एसिसी मेन्स यु–१६ इस्ट जोन कपको छनोटका लागि यही महिना राष्ट्रिय प्रतियोगिता गर्दैछ।
