नेपाल प्रहरीको केन्द्रीय अनुसन्धान ब्यूरो (सीआईबी) ले अवैध वित्तीय कारोबारमा संलग्न २१ जनालाई पक्राउ गरेको छ।
सीआईबीका अनुसार ११ जिल्लामा गरिएको कारबाहीमा संलग्न व्यक्तिहरूले आन्तरिक विप्रेषण बन्द भएको मौका छोपी विदेशबाट आउने रकमलाई अवैध तरिकाले भन्सार छली, सुनको तस्करी र कर छलीमा प्रयोग गर्दै आएका थिए।
उनीहरूले अवैध कारोबारबाट आएको रकम ‘सजिलो पे’ र ‘पेवेल नेपाल’ जस्ता डिजिटल वालेटमार्फत बैंक खातामा जम्मा गर्ने गरेको खुलेको छ। त्यसका लागि ‘मनी म्युल्स’ प्रयोग गरी ठूलो रकम जम्मा गर्ने र रेमिटेन्स भुक्तानीका लागि अनुमति लिएका मनी ट्रान्सफर कम्पनीहरूले उक्त रकम विदेशमा रहेका नेपाली कामदार तथा विद्यार्थीका आफन्तलाई पठाउने गरेको अनुसन्धानबाट पत्ता लागेको छ।
पक्राउ पर्नेहरूमा विरेन्द्र प्रसाद साह (मोरङ), दिपेन्द्र प्रसाद साह (मोरङ), श्रवण कुमार साह (महोत्तरी), तारालाल यादव (सप्तरी) र हरेराम महतो (सर्लाही) रहेका छन्। उनीहरूले DS TRADERS, DIP JYOTI TRADERS, RIYA TRADERS, र AANAND TRADERS जस्ता एजेन्ट तथा कम्पनीको नामबाट कारोबार गर्ने गरेको पाइएको छ। हालसम्मको अनुसन्धानमा उनीहरूले अर्बौं रुपैयाँ बराबरको अवैध कारोबार गरेको खुलेको छ। विरेन्द्र प्रसाद साहले २ अर्ब ८२ करोड १९ लाख ३३ हजार १८, श्रवण कुमार साहले १ अर्ब ५१ करोड २० लाख ६० हजार ४२४, तारालाल यादवले १ अर्ब ३९ करोड ५५ लाख ३५ हजार ४२५ र हरेराम महतोले १ अर्ब २ करोड ६३ लाख ९८ हजार ८४७ रुपैयाँ बराबरको अवैध कारोबार गरेको देखिएको छ।
नेपाल राष्ट्र बैंकको नियम विपरीत काम गरेको पाइएकाले उनीहरूलाई नेपाल राष्ट्र बैंक ऐन, २०५८ अनुसार अनुसन्धान भइरहेको प्रहरीले जनाएको छ।
