नेपाल कम्युनिष्ट पार्टी (माओवादी केन्द्र) का वरिष्ठ उपाध्यक्ष नारायणकाजी श्रेष्ठले संविधानका सबै उपलब्धिको रक्षा गर्ने गरी अग्रगामी हिसाबले संविधान संशोधन गर्न आफूहरू तयार रहेको बताएका छन्।
उनले पूर्ण समानुपातिक निर्वाचन प्रणालीमा जानका लागि तथा महङ्गो र भ्रष्टीकृत निर्वाचन प्रणालीलाई परिवर्तन गर्नुपर्छ भन्ने पार्टीको धारणा रहेको स्पष्ट पारे।
राष्ट्रिय समाचार समिति (रासस) सँगको कुराकानीमा श्रेष्ठले मुलुकको संसदीय अभ्यास, राजनीतिक स्थिति, शान्ति सुव्यवस्था, परराष्ट्र नीति, पार्टीका अभियान लगायत समसामयिक विषयमा आफ्नो धारणा राखेका छन्।
संसदीय अभ्यास
श्रेष्ठले नेपालमा नयाँ प्रकारको लोकतन्त्र स्थापित भएको बताउँदै यसलाई परम्परागत संसदीय व्यवस्थामा कैद गर्न नहुने बताए। लोकतन्त्रलाई व्यवहारमा कार्यान्वयन गर्न र जनतालाई प्रतिफल दिन प्रणाली र त्यसलाई संस्थागत गर्ने संविधान महत्त्वपूर्ण विषय भएको उनको भनाइ छ।
जनतासँगको सम्बन्ध
माओवादी केन्द्रले जनतासँग जोडिने अभियान चलाइरहेको बताउँदै श्रेष्ठले नागरिकको जीवनस्तर उकास्न र विकासमा फड्को मार्न नसकेको कमजोरी स्वीकार्दै त्यसलाई सच्याएर जान गरिएको प्रतिबद्धतालाई जनताले सकारात्मक मानेको बताए।
राष्ट्रिय एजेण्डामा मतैक्य किन देखिँदैन?
नेपाली कांग्रेस, नेकपा (एमाले) र नेकपा (माओवादी केन्द्र) परिवर्तनका संवाहक र मित्रशक्ति भए पनि राष्ट्रिय एजेण्डामा मतैक्य नदेखिनुको कारणबारे बोल्दै श्रेष्ठले कांग्रेस र एमाले यथास्थितिवादको सिकार भएको बताए।
नेकपा (माओवादी केन्द्र) खासै फरक छैन भन्ने विचार
सशस्त्र क्रान्ति गरेर आएको भए पनि नेकपा (एमाले) र कांग्रेसभन्दा नेकपा (माओवादी केन्द्र) खासै फरक छैन भन्ने विचारमा श्रेष्ठले आफूहरूले कांग्रेस र एमालेभन्दा फरक देखाउने गरी काम गर्न नसकेको स्वीकार गरे।
संविधान संशोधन
वर्तमान संविधान जारी भएको दश वर्ष पुगेको सन्दर्भमा संविधान संशोधनको चर्चा चलिरहेका बेला श्रेष्ठले संविधानको संशोधनको कुरा उठ्नु आम रूपमा नकारात्मक कुरा नभएको बताए। संविधानले नै संवैधानिक र शान्तिपूर्ण बाटोबाटै संशोधन गर्न सकिने सुनिश्चित गरेको उनको भनाइ छ।
अन्तर्राष्ट्रिय कूटनीति र छिमेकीसँगको सम्बन्ध
नेपालको अन्तर्राष्ट्रिय कूटनीति र छिमेकीसँगको सम्बन्धलाई कसरी हेर्नुभएको छ भन्ने प्रश्नमा श्रेष्ठले आजको विश्वमा कुनै पनि देश पूर्ण परोपकारी नहुने बताउँदै हरेक देशले आफ्नो स्वार्थलाई केन्द्रमा राखेको बताए।
युवाको विदेश पलायन
युवाको विदेश पलायन बढ्दै गएको विषयमा बोल्दै श्रेष्ठले अहिले राष्ट्रको प्रमुख राष्ट्रिय आवश्यकता भनेको सामाजिक, आर्थिक रूपान्तरण, विकास र समृद्धि भएको बताए।
